Þegar barnið æfir skíðagöngu

Hvað þarf ég að hafa í huga þegar barnið æfir skíðagöngu? 

  • Að barnið sé klætt eftir veðri.

    • Góð innanundirföt, góðir sokkar, buff fyrir háls og andlit sérstaklega ef það er kalt. Góðir vettlingar, skíðabuxur og jakki sem að heftir ekki hreyfingar barnsins. Gott er samt að klæða sig ekki of mikið því að manni hitnar fljótt við skíðagönguiðkun.

  • Gott er að vera með aukaföt, þurrt innsta lag og úlpu til að fara í eftir æfingu.

  • Passa að vera búin að borða og fara á snyrtinguna áður en mætt er á æfingu.

  • Mikilvægt er að mæta á réttum tíma á æfingar. Þjálfarar og iðkendur hittast í eða við skíðagönguhúsið í Hlíðarfjalli nema að annað sé tekið fram á Sportabler. Stundum fara æfingar fram í Kjarnaskógi ef að veðrið er slæmt í fjallinu.

  • Mikilvægt er að merkja við mætingu á Sportabler og einnig að láta vitað ef vitað er að barn mæti of seint.

  • Að barnið sé á skíðum og með stafi sem hentar bæði hæð þess og þyngd. Miðað er við að hefðbundin skíði séu um 15-25 cm lengri en barnið (því meiri reynsla því lengri skíði) og að stafir séu um 30 cm styttri en iðkandinn. Skautaskíði eru svo um 10 cm styttri en hefðbundin skíði og stafir um 10 cm lengri en hefðbundnir stafir. Þjálfarar geta hjálpað til við val á skíðum ef óskað er eftir. Ekki eru notaðir hjálmar við skíðagöngu eins í alpagreinum og brettum, enda hraðinn ekki sá sami í brautinni. 

  • Gott er að bera vax undir skíðin reglulega yfir veturinn. Leiðbeiningar um hvernig það er gert er hægt að fá hjá þjálfurum og öðrum foreldrum. Góð aðstaða er í skíðagönguhúsi til þess að sinna skíðunum.

  • Nýjir iðkendur geta fengið skíðaútbúnað leigðan hjá skíðafélaginu fyrst um sinn til prófa, áður en skíði eru keypt. Einnig er oft hægt að fá keypt notuð gönguskíði hjá Skíðaþjónustunni á Akureyrir eða kaupa þau beint af foreldrum sem auglýsa á Facebook sölusíðum eins og Skiptimarkarður Skíðafélags Akureyrar, einnig til Skíðabúnaður til sölu /óska eftir Akureyri og nágrenni og Til sölu/Óskast "Gönguskíði" Hjólaskíði,Stafir, Skór, Bindingar eða Búnaður. 

 

Hlutverk foreldra:

Skíðafélagið er rekið af foreldrum eins og allt er varðar utanumhald um æfingar og þjálfara, skipulag og framkvæmd móta, öryggismál, félagösstörf og annað er borið uppi af sjálfboðaliðastarfi foreldra. Þegar barn er skráð til æfinga hjá SKA er það yfirlýsing foreldra um að koma að starfi félagsins á einhvern hátt. Öll aðstoð er vel þegin - ekki hika við að hafa samband við formann SKA eða aðra í stjórn félagsins eða í stjórn alpa.- göngu eða brettadeild (nánari upplýsingar hér) til að ræða hvernig þú getur komið að starfi félagsins. Það er gefandi, hressandi og skemmtilegt að starfa saman í SKA. Vinna við mót er skemmtileg og þar gefst vettvangur til að hitta aðra foreldra. 

Einn liður í starfi félagsins er mótahald en þegar mót eru haldin þá þurfum við á öllum okkar mannaskap að halda. Þú þarft hvorki að kunna á skíði né vita í hverju það felst að halda mót - helstu verkefnin sem við þurfum að manna á mótum eru þessi: 

Undirbúningur fyrir mót: 

  • Merkja þarf upp marksvæðið, koma upp marki, merkja brautir og koma fyrir tímatökubúnaði.
  • Útdeila startnúmerum og merkja við hverjir eru mættir. 

Meðan á keppni stendur:

  • Brautarvarsla: Brautarverði þarf á öllum mótum. Starf þeirra felst í því að standa út í braut, vera til staðar fyrir keppendur með því að passa upp á að þeir fari rétta leið og ekki síður að hvetja þá áfram. 
  • Starfsmenn á marksvæði við ræsingu: Raða upp keppendum fyrir start og tryggja að allir séu með flögur fyrir tímatöku.
  • Starfsmenn á marksvæði í marki: Taka á móti iðkendum þegar þeir hafa lokið keppni og taka við startnúmerum.
  • Kynnir: sér um að lýsa því hvað er í gangi á marksvæði, koma með tilkynningar um breytingar á dagskrá ef þarf o.fl.
  • Sjoppa: Aðstoða við afgreiðslu í sjoppu til dæmis að gefa keppendum hressingu eftir keppni og selja einfaldar veitingar meðan á keppni stendur. 

Frágangur eftir mót:

  • Taka þarf saman marksvæði og allt sem notað er til að merkja brautir.
  • Frágangur í skíðaskála, matsal og áburðaraðstöðu sem þjálfarar og foreldrar nýta til að undirbúa skíði fyrir keppni.
  • Þvo númer og koma þeim aftur til skila, fara yfir að öll númer séu til staðar fyrir næstu keppni.

Margar hendur vinna létt verk og hér skapast kjörið tækifæri til að kynnast öðrum foreldrum og iðkendum sem eiga börn sem stunda skíðagöngu.