.
Saga Andrésar leikanna
50 ára afmæli Andrésar andar leikanna 2026
Í tilefni að 50 ára afmælis Andrésar andar leikana var haldin afmælissýning í íþróttahöllinni laugardaginn 25. apríl 2026.
Andrésarleikarnir voru fyrst haldnir árið 1976 og fagna því 50 ára afmæli árið 2026. Af því tilefni var haldin sérstök afmælissýning í íþróttahöllinni þar sem saga leikanna var rifjuð upp í myndum, viðtölum og heimildum frá liðnum árum.
Á sýningunni var ljósmyndasýning sem Hörður Geirsson safnvörður Minjasafnsins á Akureyri tók saman "opnuð" á Youtube rás Andrésar andar leikana. Sýningin er öll á stafrænu formi og settar saman sem 60 mínútuna myndband. Myndirnar endurspegla sögu leikanna á síðustu 50 árum, þróun þeirra og vöxt.
Myndasýningin er hér - sýningartími 1 klst. Við mælum með að horfa oft!
Ljósmyndir eru eftir ljósmyndarana Árna Má Árnason, Axel Þórhallsson, Baldur Dýfjörð, Bernharð Valsson, Björn Gíslason, Gísla Kristinn Lórezsson, Gísla Sigurgeirsson, Golla (Kjartan Þorbjörnsson), Guðmund Brynjarsson, Guðmund Svansson, Halldór Arinbjarnarson, Helga Steinar Halldórsson, Hermann Sigtryggsson, Hermann Sveinbjörnsson, Hörð Blöndal, Hörð Geirsson, Ívar Sigmundsson, Jón Hróa Finnsson, Kristján G. Arngrímsson, Kristján Logason, Ólaf Ásgeirsson, Rúnar Þór Björnsson, auk mynda úr safni dagblaðanna Dags og Íslendings, Þóru Leifsdóttur, Þórhalls Jónssonar, Þóris Tryggvasonar og Tómasar L. Vilbergssonar. Það er aðdáunarvert hversu mikið ljósmyndarar hafa lagt á sig við að skrásetja sögu leikana með ljósmyndum. Síðustu 25 árin hafa Þórhallur Jónsson og ljósmyndarar á hans vegum lagt á sig ómælda vinnu við að leggja sig fram um að ná ljósmynd af hverju einasta barni í braut á mótinu sem keppendur geta keypt til eignar.
Á sama tíma var sýnd heimildarmynd sem byggir á ljósmyndunum sem Hörður tók saman og texta frá Hermanni Sigtryggssyni sem Kristrún Lind Birgisdóttir nýtti til að prjóna við handrit að myndinni. Heimildarmyndin byggir einnig á viðtali við Ívar Sigmundsson, fyrrum formann Skíðafélags Akureyrar og forstöðumann Hlíðarfjalls, og Fjalar Úlfarsson, núverandi formann Andrésarnefndarinnar.
Heimildarmyndina má skoða hér - Sýningartími 22 mínútur.
Ágrip af forsögu leikanna - Skrifað á 35 ára afmæli Andrésar andar leikana af Hermanni Sigtryggssyni
Í allmörg ár komu nokkrir menn saman á kaffistofu Almennra trygginga h.f. í Hafnarstræti 100 á Akureyri. Allir höfðu þeir það sameiginlegt að vera áhugamenn um skíðaíþróttina og snerust umræður alloft um skíðamál á Akureyri, hvernig staðan væri, úrslit skíðamóta o.s.frv., enda voru þessir menn gjarnan að stússa við skíðamót í Fjallinu um helgar, eða vinna að málum Skíðaráðs Akureyrar, sem þeir voru tengdir á einn eða annan hátt á þessum tíma. Þetta voru þeir Ólafur Stefánsson, forstjóri Almennra trygginga h.f. á Akureyri, Leifur Tómasson, stórkaupmaður, Róbert Friðriksson, skrifstofumaður hjá Almennum tryggingum, Hermann Sigtryggsson, æskulýðs- og íþróttafulltrúi Akureyrarbæjar, sem hafði þá skrifstofu í húsi Almennra í Hafnarstræti 100, Ívar Sigmundsson, forstöðumaður Skíðastaða í Hlíðarfjalli, og Frímann Gunnlaugsson, eigandi Sport- og hljóðfæraverslunarinnar á Akureyri. Það var árið 1973 að til umræðu kom hjá þessum hópi að efna til barnamóts á skíðum á Akureyri fyrir allt landið. Ekki voru þá nein landsmót fyrir yngstu aldurshópana í þessari grein og svo til eingöngu keppt í þeim flokkum heima í héruðum. Töldu þeir félagar að mót sem þetta gæti orðið lyftistöng fyrir skíðaíþróttina. Ýmsir sóttu þennan kaffiklúbb heim, fengu sér kaffisopa hjá Óla Stef., tóku þátt í umræðum og lögðu inn góð orð bæði í þessu máli og öðrum. Hugmyndin um barnamót á skíðum fyrir allt landið var alllengi til umræðu í þessum hópi og var m.a. leitað umsagnar „utanaðkomandi“ aðila bæði úr röðum íþróttahreyfingarinnar og annarra aðila sem kunnugir voru mótahaldi á landsvísu. Hugmyndinni var hvarvetna vel tekið, en ekki komst þó skriður á málið fyrr en árið 1975.
Saga Andrésar Andarleikanna birtist í Skíðablaði Skíðafélags Akureyrar 2010.